Բժիշկները թվարկել են ինսուլտի թաքնված նշանները
Ուժեղ գլխապտույտ, կուլ տալու դժվարություն և մի աչքի տեսողության նվազում կարող են լինել ինսուլտի նախանշաններ: Այս մասին Daily Mail-ին հայտնել են Էդինբուրգի համալսարանի նյարդաբան Մարտին Դենիսը և Royal Devon and Exeter հիմնադրամի ինսուլտի հետազոտության ոլորտի փորձագետ, պրոֆեսոր Մարտին Ջեյմսը։
Հայտնի նշանները կարող են վկայել մոտալուտ ինսուլտի մասին՝ վերջույթների ուժեղ թուլություն և թմրություն, կրծքավանդակի ցավ, շնչահեղձություն, գլխապտույտ և դեմքի արտահայտությունների փոփոխություններ:
Այնուամենայնիվ, ոչ բոլոր մարդիկ են զգում այս ախտանիշները: Կաթվածը կարող է առաջացնել մշուշոտ տեսողություն, ինչպես նաև կրկնակի տեսողություն մեկ կամ երկու աչքերում, ասում է բժիշկ Դենիսը: Եթե տեսողության խնդիրներն առաջանում են հանկարծակի և չեն անհետանում 24 ժամվա ընթացքում, դա կարող է վկայել արյան շրջանառության խնդիրների մասին: Բանն այն է, որ երբեմն ուղեղային արյունահոսության (ինսուլտի) հետ միաժամանակ աչքի ներսում արյունահոսություն է առաջանում։ Կաթվածի մեկ այլ ոչ ակնհայտ նշան է հանկարծակի, ուժեղ գլխապտույտը:
Դենիսի խոսքով, դա չպետք է անտեսվի, եթե այն ուղեկցվում է կրկնակի տեսողությամբ, վերջույթների թուլությամբ կամ թմրածությամբ։ Կաթվածի ժամանակ գլխապտույտը և հավասարակշռության կորուստը հաճախ կապված են վեստիբուլյար համակարգի տարրերի վնասման հետ: Պրոֆեսոր Ջեյմսը հավելել է, որ հազվադեպ դեպքերում կուլ տալու դժվարությունը կարող է նաև ինսուլտի ազդանշան լինել։ Բժշկի խոսքով՝ գլխուղեղի արյունամատակարարման սուր խախտումը կարող է ազդել սնունդն ու հեղուկները կուլ տալու համար պատասխանատու հատվածների վրա։
