Գիտնականները նշել են կոֆեինի թաքնված վտանգների մասին․ ե՞րբ չարժե սուրճ խմել
Կոֆեինը կարող է խաթարել ուղեղի գիշերային վերականգնումը, նույնիսկ եթե դուք արդեն պառկած եք քնելու։
Մոնրեալի համալսարանի գիտնականներն ուսումնասիրություն են անցկացրել: Ինչպես նշվում է «Communications Biology» ամսագրում հրապարակված հոդվածում, սուրճը և կոֆեին պարունակող այլ ըմպելիքները ակտիվացնում են ուղեղը նույնիսկ քնի ժամանակ՝ նվազեցնելով դրա խորը հանգստանալու և վերականգնվելու ունակությունը:
Հետազոտողները ուսումնասիրել են 40 առողջ կամավորների գիշերային ուղեղի ակտիվությունը: Մասնակիցները լաբորատորիայում երկու անգամ պառկել են քնելու՝ մեկ անգամ կոֆեին ընդունելուց հետո, մեկ անգամ՝ պլացեբո ընդունելուց հետո: Օգտագործելով էլեկտրաէնցեֆալոգրաֆիա և արհեստական բանականություն՝ գիտնականները գրանցել են, որ կոֆեինը մեծացնում է ուղեղի «կրիտիկականությունը»՝ կարգուկանոնի և քաոսի միջև գտնվող հատուկ վիճակ, որի դեպքում ուղեղը արթուն է, ճկունորեն արձագանքում է արտաքին խթաններին և ակտիվորեն մշակում է տեղեկատվությունը: Սակայն գիշերն այս վիճակը խանգարում է ուղեղին անջատվելուն և լիովին վերականգնվելուն:
Ազդեցությունը հատկապես արտահայտված է եղել 20-27 տարեկան երիտասարդների մոտ: Երիտասարդ տարիքում ուղեղն ունի ավելի շատ ադենոզինային ընկալիչներ, որոնց արգելափակումը կոֆեինը դարձնում է հատկապես ուժեղ խթանիչ։ Տարիքի հետ այդ ընկալիչները անհետանում են, և կոֆեինն ավելի քիչ արդյունավետ է գործում։ Հետևաբար, 41-58 տարեկան մարդկանց մոտ կոֆեինի ազդեցությունը քնի վրա ավելի քիչ արտահայտված է եղել։
Այնուամենայնիվ նույնիսկ մեծահասակների մոտ սուրճը կարող է խանգարել ուղեղի լիարժեք վերականգնմանը, հատկապես, եթե այն խմում են երեկոյան։
