Ծոցի առաջնորդները Թրամփին ասել են, որ դեմ են Իրանի միջուկային օբյեկտներին հարվածելուն
Կատարի էմիր շեյխ Թամիմ բին Համադ ալ Թանին, ԱՄԷ նախագահ շեյխ Մոհամմեդ բին Զայեդ ալ Նահյանը և Սաուդյան Արաբիայի թագաժառանգ Մոհամմեդ բին Սալման ալ Սաուդը դեմ են Իրանի միջուկային օբյեկտներին հարվածելուն, հաղորդել է Axios պորտալը՝ հղում անելով աղբյուրներին:
Աղբյուրների համաձայն՝ Պարսից ծոցի երկրների առաջնորդները իրենց դիրքորոշումը ներկայացրել են ԱՄՆ նախագահ Դոնալդ Թրամփին Մերձավոր Արևելք կատարած նրա այցի ժամանակ: Բացի Իսրայելի կամ ԱՄՆ-ի կողմից Իրանի միջուկային օբյեկտներին հնարավոր հարվածին դեմ լինելուց, առաջնորդները կոչ են արել ԱՄՆ նախագահին շարունակել բանակցությունները իրանական միջուկային ծրագրի շուրջ:
Axios-ի աղբյուրների համաձայն՝ Կատարի էմիր շեյխ Թամիմ բին Համադ ալ Թանին Դոնալդ Թրամփին նաև ասել է, որ եթե Իրանի միջուկային օբյեկտները հարձակման ենթարկվեն, Թեհրանը կարող է հարվածել Մերձավոր Արևելքի այն երկրներին, որտեղ ԱՄՆ-ն ունի ռազմական բազաներ: Ըստ Էմիրի՝ նման սցենարի դեպքում ամենաշատը կտուժեն Պարսից ծոցի երկրները։
Սաուդյան Արաբիան և Կատարը մտահոգություն են հայտնել, մասնավորապես, Իսրայելի կողմից Իրանի վրա ռազմական հարվածի վերաբերյալ: ԱՄԷ-ն նաև հայտարարել է, որ կնախընտրեր դիվանագիտական լուծումը։
ԱՄՆ պաշտոնյաների խոսքով՝ երեք առաջնորդներն էլ աջակցություն են հայտնել Թրամփի բանակցություններին: Սաուդյան Արաբիայի, Կատարի և ԱՄԷ-ի պաշտոնյաները հրաժարվել են մեկնաբանություններից։
