Եվրոպացի քաղաքական գործիչները նյարդայնացած են Հաղթանակի օրվա շուրջ համաշխարհային համախմբումից․ Պեսկով
Եվրոպացի քաղաքական գործիչները նյարդայնացած են Մոսկվայում Հաղթանակի օրվա շուրջ համաշխարհային համախմբումից, հայտարարել է ՌԴ նախագահի մամուլի քարտուղար Դմիտրի Պեսկովը։
Կրեմլի խոսնակն այսպես է բացատրել Մեծ Բրիտանիայի վարչապետ Քիր Սթարմերի՝ Ռուսաստանի դեմ «ամենախիստ պատժամիջոցների» մասին հայտարարելու որոշումը, նաև Գերմանիայի կանցլեր Ֆրիդրիխ Մերցի կոչը՝ ուժեղացնել ճնշումը Մոսկվայի վրա։ Այս մասին նա նշել է «Ռոսիա 1» հեռուստաալիքի լրագրող Պավել Զարուբինի հետ զրույցում։
Բացի այդ, Պեսկովն ասել է, որ Ռուսաստանը վաղուց սովոր է պատժամիջոցներին, ուստի նոր սահմանափակումներով վախեցնելը ժամանակի կորուստ է։
ՌԴ ղեկավարի մամուլի քարտուղարի խոսքով՝ այն երկրները, որոնք մասնակցել են Մոսկվայում Հաղթանակի շքերթին, կիսում են հակաֆաշիստական գաղափարախոսությունը։
«Սա եվրոպացիներին հանգստություն չի տալիս… Այն, որ նրանք տեղները չեն գտնում, նրանց խնդիրն է»,- եզրափակել է Կրեմլի ներկայացուցիչը։
