Ալերգիայից մինչև քաղցկեղ. ինչու է կարտոֆիլի ֆրին այդքան վտանգավոր երեխաների համար
Կարտոֆիլի ֆրին և այլ արագ սնունդը հարմար չեն երեխաների սննդի համար․ երեխաների օրգանիզմը չի կարողանում հաղթահարել նման ուտեստները, որոնք ծանրաբեռնում են ենթաստամոքսային գեղձը և լյարդը։ Այս ամենը հղի է բազմաթիվ հիվանդություններով, այդ թվում՝ քաղցկեղով, զգուշացրել է սննդաբան Դարիա Ռուսակովան «360.ru»-ի հետ զրույցում։
Բժիշկը նշել է, որ կարտոֆիլի ֆրին մշակվում է սուլֆիտներով՝ դրա շագանակագույն դառնալը կանխելու համար, ինչը կարող է ալերգիա առաջացնել։
«Արագ սննդի ավելցուկային կալորիականությունը և դրանում տրանս ճարպերի պարունակությունը հանգեցնում են ապագայում սննդային հիվանդությունների և քաղցկեղի առաջացման ռիսկի բարձրացմանը», - պարզաբանել է նա։
Խնդիրն այն է, որ երեխաները հաճախ արագ սնունդը կապում են տոնական ճաշացանկի հետ, և տարբեր մարքեթինգային քայլերը ավելի մեծ ուշադրություն են գրավում դրա վրա։ Հետևաբար, արագ սնունդը կարելի է անվանել ժամանակակից աշխարհի անխուսափելիություն. վաղ թե ուշ բոլոր երեխաները կփորձեն նման սնունդ։ «Սակայն կարևոր է փորձել սահմանափակել դրանք որքան հնարավոր է երկար ժամանակով. օրինակ՝ նախադպրոցական տարիքի երեխաներին չպետք է կարտոֆիլի ֆրի և նմանատիպ ուտեստներ տալ»,- ընդգծել է Ռուսակովան։
Եթե երեխան ունի որևէ առողջական խնդիր, օրինակ՝ ստամոքս-աղիքային հիվանդություններ, ալերգիա, ֆերմենտների անբավարարություն, անհասուն ենթաստամոքսային գեղձի և լյարդի խնդիրներ, ապա արագ սնունդը պետք է կտրականապես բացառվի սննդակարգից։
Եթե ծնողները իրենց երեխային արագ սնունդ են տալիս, նրանք պետք է դա անեն զգուշորեն, աստիճանաբար, փոքր չափաբաժիններով։ Ռուսակովան խորհուրդ է տվեց երեխաներին ներգրավել խոհարարության մեջ, խրախուսել նրանց հետաքրքրությունը առողջ սննդի նկատմամբ, ինչպես նաև ներդնել սննդակարգ՝ թարմ բանջարեղենի, մրգերի, հատապտուղների և ձկների պարտադիր կանոնավոր օգտագործմամբ։
«Պետք է հասկանալ, որ երեխաները կրկնօրինակում են մեծահասակների վարքագիծը, ընտանիքի սննդային սովորությունները, և եթե ուզում եք, որ ձեր երեխան ճիշտ և բազմազան սնվի, ապա առաջին հերթին դուք պետք է նրա համար օրինակ դառնաք», - եզրափակել է սննդաբանը։
